15. 3. 2021.

I Distribucia e paketunengo e habea thaj e higijenake vastušenca andi cara Zaga Malivuk

Beogrado, 12. marto – Andi organizacia e Lole trušulosko e Srbiako thaj sar o kotor e projektosko e Germaniake barjarimaske kooperaciako „Inkluzia e Romengi thaj aver marginalizuime grupengi andi Srbija“ savo realizuil e Germaniaki organizacia vaš i maškarthemutni kooperacia GIZ, an talalstandardno cara Zaga Malivuk sesa ulavde 127 paketura e habea thaj 127 paketura e higijenake dezinfekcione produktunenca e 79 familijenge.

I distribucia e paketunengo e habea thaj e higijenake vastušenca aktivno kerel pe an 18 forura thaj e komune buvlal e Srbijate. Ando periodo de katar trin maseka, planirisardo sas o ulavipe e 9000 paketunengo e habea thaj 9000 paketunengo vaš i higijena.

I dženi katar o Forosko koncilo, i Danijela Mirjanić, naisarda e Lole trušuloske thaj e GIZ-oske, kasa buteder berša si la lačhi kooperacia thaj vadže phenda kaj akava projekto si o modelo e lačhe praksako.

„O Governo e Republikake Srbiako thaj o Foro Beograd, bi maškarthemutne organizaciengo thaj bi civilnone sektorosko našti bi maladona e varverikane problemunenca save phararen len sako dive. Nakhlo berš sas but pharo thaj roda amendar te sikavas o humano ilo an praksa thaj te unzaras o vast e amare perutnenge. Jekh tar e klidutne cilura si inkluzia e Romengi, ama ni referišiv man feri po mažutipe, či maj but po edukuipe, jekhajekhipe thaj o hakaj po pativalikano dživdipe vaj o dživdipe e dignitetosa.“

O Generalno sekretaro e Lole trušulosko e Srbiako, o Ljubomir Miladinović, sikada o naisaripe e Germaniake barjarimaske kooperaciake kaj unzarda piro suporto. „More kolege e sastimaske bućarutne sar vi more kooperantura, volontera thaj e bućarutne ando Lolo trušul sakodivesutne dži kaj si i epidemija COVID 19 sikaven kozom si importantno e manušengo solidariteto, humano inćaripe thaj personalno konsakriripe. Drago manđe kaj vi tumen prindžarden goda thaj kaj alosardan sar tumaro partnero te ovel maj phurani humanitarno organizacia - o Lolo tršul, savi andi Srbija egzistiril uč 145 berša,“ vakarda i Miladinović thaj džipherda e lavenca kaj akaja organizacia mažutisarda e maj dukhavde bešutnen an varver krize taj respektuisarda pire fundamentalne principura thaj piri misia.

O šefo e departmanosko vaš ekonomikani kooperacia andi Ambasada e Germaniaki ando Beogrado o Kristijan Šiling, risparisarda kaj i pandemiaki situacia anda but baro bisiguripe an sakodivesutno dživdipe e lokalnone khetanipengo thaj kaj akana e marginalizuime grupe si vi maj but dukhavde. Vov akcentuisarda kaj o klidutno cilo e akava projektosko si o lačharipe thaj zorjaripe e dživdimaske kondiciengo e romane minoritetne khetanimaske. „I pandemia but čhalavda len , maj but kana si lav tar i personalno higijena, higijena e kherengo, e sanitarne thaj e dživdimaske kondicie an romane talalstandardne care. Šaj kaj daradikane konsekvence upral akala care si vi katar i perspektiva e biadekvatne pašimasko e pajeste, e kanalizacijete thaj godoleske kaj ačhile bi elektrikako,“ mothoda o Šiling thaj džipherda kaj e barjarimaski kooperacia del suporto e relevantne partnerunenge kana keren zor te crden e Romen andre ando amalipe perdal o holistikano pašipe, so maj dur astarel o keripe e juristikane ramosko, keripe e bućako po institucionalno nivelo thaj direktno e khetanimasa savi si dukhavdi.

Khetane e Nacionalne alijansasa vaš ekonomikano barjaripe (NALED), o projekto „Inkluzia e Romengi thaj aver marginalizuime grupengi andi Srbija“ ka džal maj dur te kerel e aktivitetura e cilosa te informišil, preveniril thaj te sastarel e marginalizuime familije an 18 forura thaj e komune. Pale geja, ando fokuso ka ovel vi ekonomikano zorjaripe e Romengo thaj e Romnjengo thaj aver marginalizuime grupengo, e mažutimasa de katar o programo „Khetane e khetanimaske“, perdal e varverikane buća. E akava programosa savo ka ovel realizuimo an šov forura thaj e komune(Aleksinac, Kragujevac, Kruševac, Pirot, Subotica i Vranje), planirisardo si te ulavel pe vadže 1.200 paketura vaš e 210 familije so khetane kerel 24.500 paketura sar o mažutipe.

O COVID 19 viruso astarda sasti teritorija e Republikake Srbiaki de katar o širdipe e 2020.beršesko thaj godoleske kaj si len gasave dživdimaske kondicie, e merginalizuime grupe ovile maj čhalavde. Sar o respunso pi kriza thaj sar o suporto e gadalenge save si an maj phari situacia, e napia kerde te oven distribuišime e habeske thaj e higijenake paketura save resle an 4.733 familije.