30. 9. 2021.

ANGLJARDO BUĆARNIPE E DŽENENGO KATAR E GRUPE SAVE PHARES RESEN DŽI KAJ I BUĆI AN 9 FORURA THAJ KOMUNE ANDI SRBIJA

28.septembro 2021.beršesko

„ An palune duj berša kozom đeletar e aktivitetura e Inicijativake vaš inkluzia Faza 2, an 9 forura thaj e komune andi Srbija reslo pe dži kav 300 džene save arakhle peske i bući thaj sas unzardo maj but tar 1100 servisura andi sfera e lungevakteske napiengo e inkluziako. Akala napia bazirinpe pe nacionalne thaj lokalne strategikane dokumentura vaš maj but tar 700 labarutne savendar 50% si e džuvlja,“ vakarda i Aleksandra Dimić Ugrinaj pi nadumutni onlajn konferencija kana agorisardili akaja faza e Programoski e Romenge Inkluziaki thaj aver marginalizuime grupengi andi Srbija. I Dimić Ugrinaj savi si i vastarutni e programoski savo realizuil o GIZ ando ramo e Germaniake barjarimaske kooperaciako, džiperda e lavenca kaj sa akala kerdine eksperience šaj te aplikuin pe vi an aver thana.

„Perdal o publikano-privatno partnerikanipe thaj varverikane napia e bućarnimaske thaj o suporto ando bućako miškope, de katar e treningura, bućaki praksa, mentorikano suporto, dži kav biirimaske love vaš o ekipažo thaj bućarnipe ande cikne thaj maškarutne kompanije, kerdem pilot modelura save si aplikabilne vi an aver lokalne somdirekcie andi Srbija. Akava ka anel dži kav maj feder šajimata thaj i pozicia e forutnengo katar dukhavde vaj senzitivne grupe po marketo e bućako thaj kana si lav lenge amalikane inkluziatar. Zorjaripe e sinergijako thaj e koordinaciako maškar institucie po nacionalno thaj lokalno nivelo, organizacie katar o civilno amalipe thaj regionale barjarimaske agencie, sas angljardi vi realizacija thaj vurmaripe e napiengo katar i Strategija vaš socijalno inkluzia e Romengi thaj e Romnjengi 2016-2025.berš,“ dija eksplikacija i Dimić Ugrinaj.

Pi konferencija savi sas inćardi onlajn godoleske kaj si epidemija, lije kotor vi e reprezentatora katar Ministeriumo vaš i bući, bućarnipe, veteranunenge thaj socialne pučimata. e partnera ando projekto katar Sajekutni konferencija e forunengi thaj e komunengi –SKGO, lokalne somdirekcie thaj organizacie katar o civilno amalipe, sar vi e labarutne e programoske katar o Somboro, Novi Pazar, Valjevo, Bačo... Pašal akala forura, e projektoske aktivitetura sesa kerdine vi ando Apatino, Kraljevo, Vršco, Požarevco thaj i Raška. Dži kaj sas i konferencija sikado sas vi o filmo tar e eksperience thaj e razultatura e projektoske ando Požarevco, Kraljevo, Somboro thaj Novi Pazar.

„E projektura ando ramo e Inicijativako vaš inkluzia faza 2, sesa miškosarde e cilosa te del pe suporto e forunenge thaj e komunenge e Srbiake te barajaren inovativne thaj lungevakteske solucie vaš o bućarnipe e dženengo save si irisarde katar EU vaj aver straine phuvja, Roma thaj aver amalikane grupe save phares resen dži kaj i bući sar kaj si e terne, korkoreparvarikane dada/daja, džene katar ruralne thana...Po publikano konkurso lekhavde pes 50 forura thaj e komune e interesantne prepozicienca vaš e projektura. Alosardem 9 maškar lende. Sa e projektura sesa susksesune agorisarde a e rezultatura an nesave forura thaje komune resle te oven maj upre e amare aštisarimaste,“ mothoda o Ivan Milivojević, dujto generalno sekretaro ando SKGO.

O raštrako sekretaro ando Ministeriumo vaš i bući o Zoran Antić naisarda sa e dženenge save lije kotor ando projekto thaj akcentuisarda kaj seriozno intencia e raštrako thaj lako potencijalo vaš o barjaripe, sikavel pe perdal i relacia prekal e marginalizuime grupe. „Akala aktivitetura vazden upre generalno nivelo e raštrake thaj e amalipaske barjarimasko thaj den kontributo e Srbijake evroatlantske integracijenge,“ crda i konkluzia o Antić. Partnerikano suporto ando keripe e aktivitetunengo e Inicijativako vaš inkluzia faza 2, unzarda o Ministeriumo vaš i bući, bućarnipe, veteranunenge thaj socijalne pučimata, a e aktivitetura e Programoske Inkluzia e Romengi thaj aver marginalizuime grupengi andi Srbia keren pe de katar 2018. berš ando partneripe e Ministeriumosa vaš manušikane thaj minoritetne hakaja thaj amalikano dijalogo.