17. 2. 2021.

E Sertifikatosa thaj e treningosa dži kaj i bući vaš e kolisara/zavarivača

Ando ramo e aktivitetunengo savenca del pe i balval an zeja e Romenge thaj aver marginalizuime grupenge andi Srbija, agorisardo si o treningo vaš 20 kolisara vaj e zavarivača save, napal so resle dži kav o sertifikato akana šaj te si len i bući kav nekabor kompanie ando Kovino, Smederevo thaj Pančevo.

O treningo si realizuimo ando ramo e projektosko savo vastarel i Germaniaki barjarimaski kooperacia talal o anav Inkluzia e Romengi thaj aver marginalizuime grupengi andi Srbija thaj realizuil les o GIZ. Dži akana 40 džene agorisarde e treningura vaš i bući kav e šunavde bućake gazde vaj e bućake unzarutne saven trubun e bućarutne sar kaj si o šlosero – kolisaro thaj o kolisaro,. Savore resle dži kav o internacionalno prindžardo sertifikato.

„Pi baza e džanglimaski thaj e sertifikatoski save ovile dži kaj e kandidatura sićile, maj but lendar ka arakhen i bući andi kompania Statik d.o.o katar o Kovino, kaj o treningo sas inćardo. O intereso vaš e sikade kandidatura sikade vadže nekabor kompanie katar e forura an save dživin akala kursistura. Akala buća si deficitarne an i Srbia thaj o lino sertifikato unzarel o šajipe te resel pe sigo dži kaj i bući,“ phenel i Slađana Radisavljević Milutinović, i direktorka e Centroski vaš e treningura „Goša Weld Team“ (GWT) savo realizuil akava treningo.

„Amare inžinjera sajek vurmarisarde i bući dži kaj sas o treningo thaj dije pozitivne komentara tar o angljaripe e kandidatunengo. Palal e kerdine intervjua sa e dženenca save sikadile o intereso vaš i bući an amari firma, ka prezentuis lenge e kondicie e bućake thaj ka las pi bući nekabor lendar,“ phenda i Vesna Kostić, menadžerka e humane resursunengo andi kompania Statik d.o.o.

O treningo vaš e profilura kolisaro thaj o kolisaro-šlosero džal 22 divesa talal e regule e Maškarthemutnenge institutosko vaš o kolisaripe thaj astarel teoretikano kotor savo džal talal o vast e edukuimaske nivelea save si len e kandidatura. Pale geja si vi o praktikano kotor e treningosko. I sama del pe maj but po socijalno –psihologikano suporto e kandidatunengo thaj lengo zorjaripe po plano e somkonfidenciako. O klidutno cilo si te lenge neveresline kvalifikacie anen dži kav lengo maj sigutno integrišipe ando amalipe.

„Agorisardem i fundutni škola thaj dujto graduso e edukuimasko vaš o manrokerdutno/pekaro ama ni kerdem i bući an akava faho. Kerdem aver buća, maj but bikvalifikane, po vazdipe e kherengo. De kana irisajlem katar i Germania an januaro 2020.beršesko ni reslem te arakhav i bući. Mori familija, i romnji, duj čhavre thaj me, akanutne dživis de katar o socijalno mažutipe thaj e čhavrenge džiperdutne love. Akava treningo but si manđe vastno, kaj uč si man o akharipe e bućake a manđe maj klidutno si goda te šaj te pravarav more familija,“ phenel o Igor Živanović (34) katar i Smederevsko Palanka savo sako dive uštilo sas an 4 sata detharinete te resel po treningo ando Kovino.

„Duj berša kerdem i bući sar o kolisaro bi kvalifikaciako, ama iklilo kaj but si importantno te si tut o sertifikato, maj but kana san Rom. Takaj si goda, akava treningo kerel manđe baro lačhimos na feri soske ka lav o sertifikato či godoleske kaj sićilem but vareso,“ phenel o David Nedeljkov (23) katar i cara Deliblat andi komuna Kovin. Si man duj čhavre, a i romnji thaj me dživis e more dajasa thaj e phralea saves si les i bući thaj kana vi me resava pi mor bući ka si amen jekh feder dživdipe sar i familija,“ džiperel o David.

Ando Ramo e aktivitetunengo savenca suportuil pe o bućarnipe, o projekto Inkluzia e Romengi thaj aver marginalizuime grupengi andi Srbia organizuil buteder treningura vaš e profilura e bućake save roden pe po marketo thaj den o šajipe e manušenge te miškosaren korkore piri bući. Si lav tar e treningura sar kaj si e kolisara thaj e kolisara šlosera, vastarutne e vazdimaske mašinenge, tavne/ćiravutne, manikira, pedikira, frizera, e buća katar o kher, pašal o sićipe e anglikane thaj e germaniake čhibako....O projekto unzarel vi o suporto e programunenge save sigurin i edukacia e bareberšenge manušengo thaj e start up-ura e irisarde dženenge pi baza e programoski tar i readmisia.