6. 4. 2021.

I NEVI ŠANSA VAŠ O BUĆARNIPE E 500 ROMENGO THAJ E ROMNJENGO

Beograd, Media centaro, 5.aprilo 2021.beršesko

Pašal 560 džene katar o Beogrado, Valjevo thaj o Leskovco save maj phare resen dži kaj i bući, maškar lende vi 405 džuvlja, an palune 6 maseka sesa ando programo e projektosko „Ekonomikano zorjaripe e Romnjengo: angljaripe e kapacitetunengo vaš o bućarnipe thaj sombućarnipe“, thaj ageja sas lenge dino ekspertikano thaj mentorsko suporto e cilosa te resen dži kav o nevo džanglipe thaj e neve šajipena save si trubuikane po marketo e bućako. E rezultatura e projektoske aktivitetunengo si an jekh vakto vi e rekomandacie vaš e lingikane senzitivne napia kana si lav tar o bućarnipe thaj o lingengo jekhajekhipe. Akala napia trubula bi te anen dži kav o buteberšengo kontributo e ekonomikane zorjarimaske e Romenge thaj aver dženenge save phare arakhen i bući, po lokalno thaj nacionalno nivelo. Akava sas šunavdo adive pi agorutni konferencia inćardi an Media centro ando Beogrado.

„Inćaras kaj but si importantno goda kaj o fokuso e amare aktivitetunengo sas direktno suporto savo ka del e manušenge maj lačhe pozicie po marketo e bućako thaj maj lokho bućarnipe. An akava projekto inćardem buteder edukativne butilina khetanes e Nacionalne servisea vaš o bućarnipe, a e 40 Romnjenge thaj e 10 Romenge sas organizuisardo fah treningo vaš i bući frizero, pedikiro, manikiro, ćiravno, sivno/suvno, o dženo/dženi savo dikhel thaj mažutil e aver manušen vaj e čhavren save našti korkore te dživin, o kolisaro, thaj ageja maj dur. Pašal akava sesa unzarde vi e kursura e straine čhibjake so ka vazdel lenge šanse vaš o bućarnipe thaj sombućarnipe. Palal o agorisardo treningo nesavenge lendar sas dino širdimasko materijalo vaš i bući,“ phenda pi konferencija i Slavica Vasić i prezidentka e Romane džuvljikane centrosko Bibija, savo khetane e aver organizacijenca katar o civilno amalipe sar kaj si Rosa katar o Leskovco thaj Most 014 katar o Valjevo, realizuisarda akava projekto.

„Džav an maškarutni škola ando Leskovco thaj si man 17 berša. Interesuil man akava treningo kaj mangav te si man o zanato savo ka del ma o šajipe te resav dži kaj e love dži kana paralelno sićov andi škola. Traisarav e dadea thaj e dajasa thaj vadže trin pejenca thaj e phralea. O dad kerel i bući pe konstrukcie e kherenge a i daj ačhel khereste sar i hulavni. Naisarindoj e akava treningoske akana si man o džanglipe thaj o sertifikato thaj šaj te arakhav i bući. Unzardo sas mange vi o kotor e ekipažosko thaj kana resava dži kav averso so si trubuikano, ka lav te kerav i bući khereste,“ dija i eksplikacia i Sevda Šabanović, jekh tar gadala save lije te keren treningura thaj savi sas pi konferencia ando Media centro.

„O Lekovco, Valjevo thaj o Beogrado feri trin si de katar 18 forura thaj e komune kaj realizuin pe e aktivitetura e projektoske sosa mangas te das o suporto thaj te das o šajipe vaš o bućarnipe e dženenge katar e grupe save phares šaj te arakhen i bući. Katar i empiria dži kaj savi reslemas kana kerdemas akala aktivitetura, dikhas save bare problemura si e Romnjen kana den andre thaj roden piri pozicia po marketo e bućako. I empiria sikada kaj o suporto e akala džuvljenge musaj te resel de katar buteder riga, te mangas te von arakhen i bući: de katare e institucie, civilne organizacie, sar vi de katar i familia thaj maj pašo trujalipe,“ phenda i Ivana Simonović, i projektno menadžerka e Germaniake barjarimaske kooperaciako vaš o projekto „Inkluzia e Romengi thaj aver marginalizuime grupengi andi Srbia“ savo realizuil o GIZ savo unzarel svatuimasko thaj finansikano suporto e projektoske „Ekonomikano zorjaripe e Romnjengo: angljaripe e kapacitetosko vaš o bućarnipe thaj sombućarnipe.“

„Palal i prepozicia de katar o Ministeriumo vaš i bući, bućarnipe, veteranunenge thaj socijalne pučimata, o Governo e Srbiako an februaro akceptirisarda i Strategia e bućarnimastar vaš o periodo 2021 – 2026.berš. Lako generalno cilo si o keripe e stabilne thaj lungevakteske barjarimasko pi baza e džanglimaski thaj e bućaki savi haćarel o digniteto. E ulavde napia sesa ande vaš o angljaripe e poziciako kana si an pučhipe e džuvlja, terne, džene saven si o invaliditeto, gadala save labaren socijalno finansikano mažutipe, thaj maškar lende vi e Roma thaj e Romnja. Sas amen andi sama goda kozom si von procentualno reprezentuime po marketo e bućako, sar vi aver karakteristike save sikaven kaj inćaren bifavorikani pozicia po akava marketo,“ dija eksplikacia i Jelena Vasić, uči konsilerka vaš o kreiripe e napiaengo phandlo e aktivne politikasa vaš o bućarnipe ando Ministeriumo e bućako thaj e bućarnimasko. I Vasić džipherda e lavenca kaj ando keripe e Strategiako thaj aver aktivitetunengo but importantno rola khelen eksperience thaj i lačhi praksa sar kaj si gadaja savi iklel katar o akava projekto.

O projekto e Germaniake barjarimaske kooperaciako „Inkluzia e Romengi thaj aver marginalizuime grupengi, savo realizuil i Germaniaki organizacia vaš i maškarthemutni kooperacia GIZ, sas miškosardo an 2018.berš e cilosa te del suporto e aktivitetunenge save kerel vaj planiril te kerel i raštra Srbia ando ramo e Strategiako vaš socijalno inkluzia e Romengi thaj e Romemnjengi andi Republika Srbija 2016-2025, savi realizuil pe andi kooperacia e Ministeriumosa vaš e manuškane thaj minoritetunenge hakaja e Srbiake Governoske.