E participantura e butilinake jekhte cirkosko talal o anav O hakaj pe egalikane šanse andi sfera e bućaki thaj e bućarnimaski, sar vi e napja thaj e programura e „Nacionalne servisosko vaš o bućarnipe vaš e kategorije save maj phares resen dži kaj i bući“, sas len o šajipe te detalikanes informišin pes kotar e hakaja phandlo e bućasa thaj e bućarnimasa. Pale geja lenge sesa dine informacije gadalestar kozom si vastno te len aktivno rola sar individue ando proceso e bućake rodimasko, ando labaripe e šajipengo thaj e resursunengo save ačhen lenge talal o vast, ando senso te angljaren pire profesionalne kompetencije thaj e džanglimata.

E reprezentatora katar Nacionalno serviso vaš o bućarnipe vakarde kotar e napja vaš o ispidipe e dukhavde grupenge bućarnimasko thaj an inćardine butilina sikade e participanturen sar funkcionišin e subvencie vaš o bućarnipe thaj sombućarnipe, miškope e korkore pire biznisosko, sar te resen dži kav e praktikane džanglimata, prekvalifikacia thaj dokvalifikacia thaj ageja te oven maj kompetentne thaj maj suksesune po marketo e bućako. Maj dur e instrukcie sesa dine kotar o programo e publikane bućengo, treningo vaš o aktivno rodipe e bućako, treningo palal o manglipe e bućiunzarutnengo, sar vi kotar o programo e funkcionalne fundutne edukuimasko.

Ando butilinako jekhto cirko savore von save ovile te sićon sas len o šajipe te resen dži kav e konkretne respunsura phandlo e bućarnimasa thaj e suportosa save del o Nacionalno serviso vaš o bućarnipe. Lenge sesa dine džipherdutne informacije kotar e mehanizmura phandlo e lenge hakajesa pi bući thaj sar akava hakaj trubul te protektuil pe, so si lenge garantuimo talal jekhajekh kondicije thaj bi diskriminaciako.

Pale geja ando ramo e projektosko „Prevencia thaj i eliminacia e čhavrikane prandimasko andi Srbija“, organizuimo sas o pikniko ando Palić e čhajorenca katar o Čantaviro thaj i Subotica. O pikniko sas okazia vaš o amalipe thaj vakaripe tar e verver dživdimaske opcie thaj e šajimata, so sas ulavde vastno vaš o vazdipe e gođako phandlo e čhajorenđe pozicijasa thaj lenge trubuimasa te si len o suporto sar bi pherena pire potencijala.

E butilina ando Leskovco, Smederevo, Novi Sad, Bačka Palanka, Subotica, Vranje, Kruševac thaj Kragujevac, sar vi vizita e Palićeste realizuime sesa ando ramo e projektosko „I prevencija thaj eliminacija e čhavrenge prandimasko andi Srbija“ savo finansiril i Ambasada e Thagarimasko e Holandijako andi Srbija thaj o Ministeriumo vaš i ekonomikani kooperacija thaj o barjaripe e Phandline Germaniake Republikako (BMZ), sar o kotor e programosko e Germaniake barjarimaske kooperaciako „Inkluzia e Romengi thaj aver marginalizuime grupengi andi Srbija“.