15. 9. 2021.

I srbikani- germaniaki platforma vaš o pharuvipe e eksperiencako tar i inkluzia e marginalizuime bešutnengo po marketo e bućako

Beogrado, 10.09.2021 – Ando ramo e barjarimaske kooperaciako „Inkluzia e Romengi thaj aver marginalizuime grupengi andi Srbija“ savi realizuil o GIZ, organizuimi sas virtuelno studiaki vizita e cilosa te kerel pe i platforma vaš o pharuvipe thaj khetanikano sićipe maškar srbikane aktera thaj e kolege katar i Germania save keren i bući phandlo e marginalizuime manušenge inkluziasa po marketo e bućako. Virtuelno pharuvipe sas kerdino 6 dive ando onlajn formato thaj astarda maj but tar 100 reprezentatora katar raštrake institucie thaj o civilno sektoro.

I delegacia e Germaniaki thaj e Srbiaki pharuvde eksperience tar o informišipe e marginalizuime grupengo kotar e napia e suportoske ando bućarnipe thaj kotar o importantno rola e organizaciengo e civilnone sektorosko kana si lav tar i medijacija maškar akala grupe thaj e institucie save unzaren akava felo e suportosko. Sesas sikade e misala e lačhe praksako andi realizacia e aktivnone napiengo vaš o bućarnipe e marginalizuime thaj aver grupengo save phares resen dži kaj i bući.Pale geja, sesas sikade vi varverikane modelura e politikake kreirimaske andi sfera e bućarnimaski, save si bazirime pe gevaja thaj i metodologia vaš o vurmaripe thaj i evaluacia e rezultatunengi e akala napiengi save trubun te angljaren o bućarnipe.

- Lašale thaj pherde ileske amen sam, takaj kaj si amen limitura godoleske kaj si o koronaviruso, ama reslem te organizuis virtuelno pharuvipe so sikadilo sar but suksesuno solucia savi si las vi nesave advantažura soske ageja si o šajipe te khidas vi maj but e participantura. Akava si but importantno paso andi maj dur kooperacia thaj inćaras kaj si lačhe goda kaj po jekh than sas amen vi civilno sektoro, vi e reštrake institucie. Goda si o klido vaš o suksesuno keripe e inkluziake napiengo. Feri e khetane zorenca šaj te resas dži kav o cilo so astarel jekh sasti integracia, na feri e Romengi thaj e Romnjengi , či aver marginalizuime grupengi ando amalipe thaj po marketo e bućako – phanda i Aleksandra Dimić Ugrinaj savi si i vastarutni e programoski „Inkluzija e Romengi thaj aver marginalizuime grupengi andi Srbija“ savo vastarel o GIZ.

I mažutni e ministroski vaš i bući bućarnipe, veteranunenge thaj e socijalne pučimata savi sas po čikat e srbikane delegaciako , prof.dr Sandra Grujičić, akcentuisarda kaj o virtuelno pharuvipe e eksperiencako e Germaniake institucienca pherda o aštisaripe.

- Virtuelno pharuvipe e eksperiencako e Germaniake institucienca ando kreiripe e napiengo e aktivnone politikako, phandlo e bućarnimasa, pherda o aštisaripe e Ministeriumosko vaš i bući, bućarnipe, veteranunenge thaj socijalne pučimata, paćas vi aver dženengo save len kotor an akava maladipe. Akala politike si bazirime pe faktura thaj si len o cilo te lokheren bućarnipe e marginalizuime grupengo, maškar lende vi e Romengo. Ando ramo e napiengo si inkorporime e instrumentura vaš o vurmaripe e efektunengo e akala napiengo vaš o bućarnipe. Si amen paćavipe kaj maj dureder susksesuni kooperacia e GIZ-osa thaj e institucienca katar i Germania, ando akordo e lačhe praksasa andi sfera e bućarnimaski, ka del o kontributo e maj feder avutne angljarimaske kana vakaras tar i politika e bućarnimaski andi Srbia – phenda i mažutni e ministroski vaš i bući thaj o bućarnipe, prof. dr 
Sandra Grujičić.

-Virtuelno studijsko vizita nakhli upral amaro aštisaripe, na feri godoleske kaj si tehnikane limitura, sar inćardam dži akana, ando onlajn sićipe thaj eksperiencako pharuvipe. Maj but akalestar, sikadilo kaj si o barvalipe ando ingardipe thaj o unzardo kvaliteto an akava felo e studijake vizitako- dija o vakaripe o Nenad Vladisavljev, prezidento e Amalipasko e romane studentunengo.

O Programo e Germaniake barjarimaske kooperaciako „Inkluzia e Romengi thaj aver marginalizuime grupengi andi Srbija“ khetane e Ministeriumosa vaš e manuškane, minoritetne hakaja thaj amalikano dijalogo keren e napia vaš o ciknjaripe e diskriminaciako thaj e stereotipunengo, maj dur, vaš o angljaripe e kooperaciako maškar klidutne institucie po nacionalno thaj lokalno nivelo, thaj realizuil e napia vaš ekonomikano zorjaripe thaj o barjaripe e lokalne mehanizmunengo.