9. 9. 2021.

Maj lokhes dži kav o bućarnipe ando Beogrado e mažutimasa savo unzarel o GIZ thaj i Fondacia Divac

Beograd, 08.09.2021 – E partnera po projekto „Ispidipe e bućarnimasko e Romengo thaj aver marginalizuime grupengo ando Beogrado“, sikade e rezultatura napal so realizuisarde e napia savenca zumavde te angljaren o bućarnipe e Romengo thaj aver marginalizuime grupengo thaj e gadala manušengo save phares resen dži kaj i bući ando Beogrado. O projekto si kotor e programosko e Germaniake barjarimaske kooperaciako „Inkluzia e Romengi thaj aver marginalizuime grupengi andi Srbija“ savo realizuil organizacia vaš i maškarthemutni kooperacia GIZ, khetanes e Ministeriumosa vaš e manuškane thaj minoritetne hakaja, maj dur e Fondacijasa „Ana thaj Vlade Divac“, e Foroske sekretarijatea vaš i socijalno protekcija, e Srbijake barvalimaske (privredne) komorasa, e akademijasa Edukativa, e Nacionalne servisea vaš o bućarnipe, e Srbijake Romenge Forumea, e SOS čhavrikane gavenca, thaj aver bućiunzarutneca. Khetanikani bući sa e partnerunengo kerda te 32 džene arakhle i bući an 15 cikne, maškarutne thaj bare firme ando Beogrado, 31 dženo agorisarda fah edukacia an 7 fah profilura save si rodine po marketo e bućako an varverutne firme ando Beogrado, a 6 kandidata si len grantura vaš o ekipažo sosa šaj te širdisaren thaj te angljaren piro privatno bizniso, uzal o ekspertikano treningo thaj mentorsko suporto.

Dži kaj realizuisajlo o projekto unzarde sesa trin felura e suportosko: edukacia vaš e profilura rodine po marketo e bućako, suporto te širdisaren piro privatno bizniso thaj o treningo vaš o konkretno than e bućako e cilosa te o kandidato si les i bući sigo napal o sićipe. Pašal akala trnigura thaj i edukacia, organizuisarde sesa duj rotale astala e Srbiake barvalimaske komorasa, e Nacionalne servisea vaš o bućarnipe thaj e organizacijenca katar o civilno amalipe tar i tema: Bućarnipe e dukhavde grupengo.

-Pharikerav e GIZ-oske thaj e Fondaciake „Ana thaj Vlade Divac“ soske suksesune realizuisarde o projekto takaj kaj sas i pandemija. O suporto e dženenge katar dukhavde grupe si o prioriteto e Sekretarijatosko vaš socijalno protekcia e Forosko Beograd. Savorengo cilo sas te po jekhto than informišis e džene katar o Romano nacionalno minoriteto kaj si akala projektura thaj te motivišis len te den andre, te len te keren e treningura save šaj te lokheren lengo dživdipe te vazden lengo thaj lenge familijengo standardo e dživdimasko. Andi kooperacia e 17 foroske komunenca reslam dži akala džene save sikade o intereso te edukuin pe vaš e zanatura. O Sekretarijato vaš socijalno protekcia maj dur ka kerel i bući te lačharel o statuso e dženengo katar Romano nacionalno minoriteto thaj aver dukhavde grupengo – phenda i Nataša Stanisavljević, sekretarka e Sekretarijatosko vaš socijalno protekcia e Forosko Beograd.

I Fondacia „Ana thaj Vlade Divac“ sas la o udžilipe te pi teritorija e Foroski Beograd realizuil e napia savenca del pe o suporto maj dukhavde grupenge, maškar lende vi e Romenge, e gadala manušenge save irisajle andi phuv pi baza e Haćarimasko tar i readmisia, e džuvljenge, ternenge, e dženenge saven naj fiesavi fah kvalifikacia, save si bi bućako stažo, maj dur , save si viktimura e familijake nasulimasko, e ternenge bi dad/daj.

- Takaj kaj sas but phare kondice phandlo e korona epidemiasa, i Fondacia vizitisarda e manušen katar averikane dukhavde grupe thaj dija lenge o suporto te den andre ando projekto savo mažutil lenge te angljaren piro thaj pire familijengo dživdimasko standardo. Maj but tar 300 kandidatura katar upralpomenisarde grupe lije kotor ande info sesije, a 69 nakhle sa trin nivelura e suportoske. 31 dženo agorisarda o treningo vaš e profilura save si rodine po marketo e bućako: o kontabilo(dženo savo vastarel konto), o vastarutno e vazdimaske mašinengo, frizero, e pajengo instalatero thaj pedikiro/manikiro. But sam čhaljarde kozom džene lije kotor an akava projekto thaj suksesune resle dži kaj i bući – vakarda o Uroš Delić, menadžero e projektosko vaš o bućarnimasko suporto andi Fondacia „Ana thaj Vlade Divac“.

Kotar 69 džene save kerde varverutne treningura, vadže 52 Roma lije kotor ando projekto, a 17 lendar sesa gadala saven si len cikni šansa te arakhen i bući, save si terne vaj maj phurane e 50 beršendar , vaj ni kerde nisavi bući but berša maj anglal.

- Majšukar rezultato e projektosko si goda kaj lije kotor buteder manuša katar dukhavde grupe ando amalipe thaj po marketo e bućako. Pale geja si o sukseso kaj but lendar arakle i bući. I Fondacija Divac aplikuisarda o koncepto e suportosko savo del šansa e programoske vaš Inkluzia e Romengi thaj aver marginalizuime grupengi andi Srbija. Goda astarel vi o pašipe savo si adaptirimo sakoneske individualno, leske šajimaske te kerel e treningura, te korkore miškosarel piro bizniso. Sa akava, sar sikadilo, del lačhe rezultatura ando bućarnipe. Aver importantno aspekto si multisektorsko kooperacia thaj inkluzia e buteder partnerunengo katar e sfere e bućarnimaske thaj e socijalne inkluziake – mothoda i Vesna Vidojević, uči projektno menadžerka e programoski „Inkluzia e Romengi thaj aver marginalizuime grupengi andi Srbija“.

Generalno cilo e projektosko savo sas realizuimo jekh berš, de katar o septembro 2020 – septembro 2021, sas te angljarel pe ekonomikano statuso thaj o bućarnipe e Romengo thaj aver dženengo save phares resen dži kaj i bući thaj oven katar e marginalizuime grupe ando Beogrado. Ando fokuso sesa trin nivelura e napiengo savenca dija pe o suporto andi sfera e bućarnimaski: fah treningura vaš e profilura save si rodine po marketo e bućako, treningo po than e bućako thaj bućarnipe kav e prindžarde gazde e bućake, sar vi o grant ulavipe sosa e kandidatura resle dži kav o šajipe te miškosaren korkeore piro bizniso.