21. 12. 2020.

O Nevo cikluso e paketunenge distribuciako sar o suporto e romane thaj aver familijenge katar e marginalizuime grupe

Beogrado, 15 decembro – Andi organizacia e Lole trušuleske e Srbiake thaj sar o kotor e projektosko savo realizuil e Germaniaki organizacia vaš maškarthemutni kooperacia – GIZ , an beogradeske komune Rakovica, Čukarica, Novi Beograd thaj Zvezdara, ulavde sesa 201 paketura e habenca thaj e higijenake vastušenca (khetane e vastušenca vaš i dezifekcia). Akava ulavipe kerda o lačhimos e 158 familijenge save si pi margina e amalipaski. Akaja akciasa savi sas kerdini an jekto epaš e decembrosko thaj ando ramo e trite distribuciako, o GIZ thaj o Lolo trušul prolunđisarde piri koopercia. Liduj organizacie khetane kerde maj anglal duj akcie thaj ulavde sa an sa 399 paketura pi teritoria e Beogradeski.
„Si amen gođi kaj talal e pandemiake kondicie but maj phares ovilo e forutnenge save si an maj daradikani situacia. Lenge akana trubul džiperdutno suporto. Džanas kaj buteder manuša katar o romano khetanipe dživin an talalstandardne care thaj godoleske si len maj bare anglaldispozicie te nasvaljon,“ akcentuisarda o Zoran Radojičić, šerutno e Beogradosko. Vov pale phenda kaj o Foro Beograd sistematikanes kerel i bući te čhinavel e problemura save phararen e Romen thaj realizuil e napia savenca mangel pe i protekcia e Romenge sastimasko. „Sigurisardam fundutne dživdimaske trubuimata, anglal sa aver i paj, habe thaj higijenake paketura. O Sekretarijato vaš socijalno protekcia e Forosko Beograd khetane e foroske Instituciasa vaš e biocidura, kerda dezinfekcia, dezinsekcia thsj deratizacia an biformalne bešimaske thana thaj ageja stopirisada te epidamia buvljardol akate.“

Naisarindoj e Germaniake barjarimaske kooperaciake godoleske kaj unzarda piro suporto, o beogradesko šorutno thoda akcento pe goda kaj butivar sesa e bešipena e reprezentatorenca katar o GIZ thaj kaj lako operativno mažutipe putarel o vudar te foroske zora adekvatno pheren trubuimata e manušenđe katar o romano khetanipe thaj ageja te angljaren o kvaliteto e dživdimasko e forutnengo save si an maj daradikani situacia.

Pašal i distribucia e paketunengi savi sas kerdini an thagar foro, vi an aver 15 forura thaj e komune buvlal e Srbijate sas kerdini jekh akcia. „An akava cikluso sa an sa ka oven ulavde 6000 paketura e suportuimaske – 3000 e habenca thaj 3000 e higijenake paketura – vaš 800 marginalizuime familie save bešen an 18 partnerikane forura thaj e komune. Ando fokuso si e Roma thaj e Romnja save bešen an talalstandardne care,“ phenda o Robert Bu, o šorutno e timosko savo inđarel o projekto „Inkluzia e Romengi thaj aver marginalizuime grupengi andi Srbia“.

„Amaro cilo si te e romenge thaj aver marginalizuime familijenge unzaras so maj buvlo suporto, maj anglal e gadalenge an duj talalstandardne care – Okretnica 75 po Nevo Beogrado thaj Lazari pe Zvezdara. An akala duj care zumavas te siguris i paj e manušenge sar vi e sanitarne kabine. Pale geja, amare partnerikane organizacie si an sajekutno kontakto e dženenca save bešen an akala care thaj zumaven te motivišin len sar bi von lena kotor vi an aver projektne aktivitetura, sar kaj si e treningura save keras thaj save šaj te oven po lengo lačhimos – trenigura vaš o sombućaripe, džikvalifikacia thaj but vareso aver,“ vakarda o Bu. Vov risparisarda kaj o projekto „Inkluzia e Romengi thaj aver marginalizuime grupengi andi Srbija“, khetane e organizaciasa Forumo e Srbiake Romengo, realizuisarda o programo e psihosocialne mažutimasko thaj e juristikane mažutimasko ando Beogrado. Akava anda dži kav o formiripe duj komjuniti centrunengo ando srbikano thagar foro.

De katar o širdipe e korona pandemiako akava projekto anda buteder aktivitetura e cilosa te ačhavel pe o buvljaripe e virusosko, a sa e napia sesa bazirime pi analiza e trubuimatengi kerdini de katar partnerikane forura thaj e komune - Aleksinac, Apatin, Bač, Beograd, Kragujevac, Kraljevo, Kruševac, Novi Beograd, Novi Pazar, Požarevac, Pirot, Raška, Sombor, Subotica, Valjevo, Vranje, Vršac thaj Zvezdara. I kooperacia e Srbiake Lole trušulea ando ulavipe e paketunengo ka džal maj dur te kerel pe dži kav o marto e avutne beršesko kana ka oven distribuišime sa an sa 18000 paketura vaš 3500 marginalizuime familie katar akala forura thaj e komune.

An i kooperacia e Nacionalne alijansasa vaš o ekonomikano barjaripe - NALED, o projekto „Inkluzia e Romengi thaj aver marginalizuime grupengi“ ka džal maj dur te kerel e aktivitetura e cilosa te informišil, preveniril thaj sastarel e marginalizuime familijen katar pomenisarde forura thaj e komune. Pale geja, ando fokuso ka ovel vi o ekonomikano zorjaripe e Romengo thaj e Romnjengo sar vi aver marginalizuime grupengo, e mažutimasa savo unzarel o instrumento „Cash for Work“, thaj verver bućarno angažmano (sar kaj si e publikane buća). Akava programo savo ka ovel realizuimo an šov forura thaj e komune (Aleksinac, Kragujevac, Kruševac, Pirot, Subotica i Vranje) ka kerel te oven line pi bući 210 džene.