15. 4. 2021.

O Publikano akharipe vaš e prepozicie projektoske: Miliono evra vaš o bućarnipe e bešutnenge grupengo save phares resen dži kaj i bući

I Sjekutni konferencia e forurengi thaj e komunengi (SKGO) thaj e Germaniaki organizacia vaš i maškarthemuti kooperacia (GIZ), ando ramo e projektosko „Inicijativa vaš i inkluzia 3“, lekhavde o konkurso vaš o alosaripe e 10 lokalnone somdirekciengo savjenge ka del pe o suporto te anen inovativne thaj lungevakteske solucie andi sfera e bućarnimaski kana si ando pučipe e grupe e bešutnenge save phares resen dži kaj i bući. Sasto molipe e lovengo savo ačhel pi dispozicia ando ramo e Akhardimasko vaš o khidipe e projektoske konceptunengo si 1.000.000 evra, a o maksimalno molipe e grantunengo e jekhune projektoske si 100.000 evra.

Oficialni prezentacia e Akhardimaski sas inćardi onlajn, a an akaja okazia sas thodino akcento po goda kaj o projekto trubul te del o kontributo sar bi ovela vazdino senzibliteto e lokalnone khetanimasko kana si lav tar e trubuimata thaj e problemura savenca maladon pe e pomenisarde kategorie e bibućarne dženenge.

O Đorđe Staničić, generalno sekretaro ando SKGO, vakarda kaj perdal e averčhande aktivitetura sesa kerdine e kondicie vaš o bućarnipe e maj but tar 500 dženengo save sesa irisarde de katar e EU phuvja – e gadala save rode o azilo, e Roma thaj aver marginalizuime grupe.

„E realizuime projektura thaj e aktivitetura sesa kerdine ando ramo e varverutne sferengo sar kaj si stabilno agrikultura thaj o gavengo turizmo, sombućarnipe, o suporto e socijalne biznisoske, keripe e servisosko „Mažutipe ando kher“ thaj e reciklažne avlinengo sar vi o pokhinipe e trubuikane vastušengo vaš i primarni selekcia e gunojeski, o treningo thaj o bućarnipe ando ramo e tekstilne thaj e procesuimaske industriako. Godoleske kaj sas kerde lačhe rezultatura, i realizacia e Inicijativaki vaš i inkluzia – trito faza, džal maj dur ando ramo e programosko Inkluzia e Romengi thaj aver marginalizuime grupengi andi Srbija, takaj kaj si e problemura phandlo e pandemijasa KOVID 19,“ phenda o Staničić.

O Kristijan Šiling, šefo e Departmanosko vaš i maškarthemutni kooperacia e Germaniake ambasadako an o Beogrado akcentuisarda pi prezentacia e publikane akharimasko:

„O Programo Inkluzia e Romengi thaj aver marginalizuime grupengi si la učo nivelo e politikane atenciako thaj godoleske si jekh tar amare klidutne prioritetura vaš i barjarimaski kooperacia. Pi baza e eksperiencaki savi ovili palal jekhto faza e Inicijativako vaš i inkluzia, akana sam sigurne kaj ka palpale resena but lačhe prepozicie de katar e lokalne somdirekcie. Ulavde das i pativ e lokalne khetanipenge save keren i zor te oven proaktivne an i socijalno inkluzia. Lendar avile e napia tar o angljaripe e bućarnimasko, sar vi aver napia save ka mažutin i antidiskriminacia, maj bari participacia thaj maj lačho haćaripe e dženengo save si e reprezentatora katar lokalne institucie thaj e unzarutne e bućake katar e cikne thaj maškarutne firme. Akaja kooperacia si fundamentalno vastni vaš o sukseso e projektosko kaj numaj khetane šaj te maras amen e bare problemunenca ando avutnipe.“

O Zoran Antić, e raštrako sekretaro ando Minsteriumo vaš i bući, e veteranunenge thaj e socijalne pučimata, naisarda e Germaniake kooperaciake vaš o barjaripe kaj „si amen o kontinuiteto andi bući thaj kaj džan maj dur e projektoske aktivitetura“.

„ O cilo e akava projektosko dži kav agor si ando akordo e strategikane cilunenca save thoda anglal peste o Ministeriumo, ama musaj te phenel pe kaj si lav tar e khetanikane zora sa e rigengo pe sa e nivelura. I nacionalno politika e bućarnimaski si la andi baza o unzaripe e šajimasko e savorenge te si len jekh respektuikani bući, talal jekh kondicie thaj po fundo e Strategiako savi anda o Ministeriumo vaš o avutno periodo. Ulavdi sama thaj o fokuso si amen po bućarnipe e bešutne kategoriengo save phares arakhen peske i bući,“ vakarda o Antić.

E prepozicie e projektoske save sesa bičhalde ando ramo e akava Akharimasko, musaj te oven lačharde e nacionalne thaj e lokalnone strategikane dokumentunenca thaj te putaren e vudara vaš o bućarnipe e dženengo save si irisarde katar e EU phuvja kaj rode o azilo, maj dur o bućarnipe e Romengo thaj e marginalizuime amalikane grupengo. O akharipe vaš e prepozicie e projektoske oficialno sas šunavdo po 13.aprilo, po sajto SKGO (www.skgo.org) thaj ka džal dži kav 05.majo.

An jekhto faza e projektoski „Inicijativa vaš i inkluzia“ unzardo sas o suporto e projektne timunenge an efta forura thaj e komune (Požarevac, Arilje, Sokobanja, Kučevo, Novi Pazar, Bečej i Mladenovac), a an dujto faza alosarde sesa inja forura thaj e komune (Valjevo, Požarevac, Sombor, Vršac, Bač, Apatin, Kraljevo, Raška i Novi Pazar).

O projekto „Inicijativa vaš i inkluzia 3“ realizuil o SKGO thaj si o kotor e maj buvle programosko e Germaniake barjarimaske kooperaciako „Inkluzia e Romengi thaj aver marginalizuime grupengi andi Srbija“ vastardo de katar o GIZ thaj ando partneripe e Ministeriumosa vaš e manuškane thaj minoritetunenge hakaja thaj amalikano dijalogo.

Fuljaren i konkursno dokumentacia