Ando ramo e programosko „Inkluzia e e Romengi thaj aver marginalizuime grupengi andi Srbija“ savo realizuil DeutscheGesellschaftfürInternationaleZusammenarbeit (GIZ) GmbH, andi kooperacia e Ministeriumosa vaš e manuškane thaj minoritetne hakaja thaj amalikano dijalogo, akanak džal i relaizacija e treningosko vaš e šlosera thaj kolisarutne, khetane e Themeske univerzitetosa ando Nišo. Ando sićipe o fah suporto unzarel o GFA Counsalting Group, andi kompanija Tim Indusriel Steel ando Nišo.

O treningo si vaš e 5 šlosera thaj e 5 kolisarutne thaj lija te džal po agor e februarosko dži kav o agor e aprilosko 2022.beršesko. I Jovana Čanji Aranđelović katar o Themevsko univerziteto ando Nišo, vakarda kaj von si but čhaljarde sar alosarde e kandidatura thaj kaj o proceso e selekciako sas pharo, ama po agor lekhavde pes kozom trubul e lačhe thaj motivišime kandidata vaš o treningo. Maj but iklistilo anglal, sar maj feder, o kandidato savo ovilotar po sićipe zala maj palal thaj sas but motivišimo te lel kotor ando treningo soske vi ovilo te dživil harno vakto ando Nišo.

Maškar e kandidatura sas vi jekh savo sas les i eksperienca takaj kaj si zala popurano (50), o Dejan Džemailović: „Nekana sas man o kontakto e metaloske fahosa, agorisardem maškarutni škola vaš o metalostrugaro, ama nikana ni kerdemas i bući an akava faho. Kerdem i bući ando magacino e beršenca, semas šefo gote thaj palal goda i firma đelitar ando bankroto. Si štar berš sar semas andi Slovakia te kerav gote i bući perdal i agencia vaš o bućarnipe, thaj arakhle mange o than ando Folksvagen. Trin čhon maj palal dikhle kaj sajek kerav upral i norma thaj momentalno angažuisarde man direktno te kerav vaš i kompania, dije mange o apartmano thaj phende mange te akharav i familija. I romnji thaj duj čhajora resle, ama lenge ni kamlo pe but gote (soske o dživdipe akote si kher-bući), e čhajora džan an škola thaj kana ovili korona lijam i decizia te irisaras amen andi phuv.“ O Dejan čhaljardo si sar džal o treningo, lokhes sićol šlosersko džanglipe thaj paćal kaj palal akava ka akharen les po sajekutno than e bućako.

Palal o dreno/strugo savo čhinel metalne profilura sas o terno Nemanja Uskoković kana maladilem lesa. Vov si o studento po štarto berš e arhitekturako. SI les o plano te palal e agorisarde studije khetane e kolegunenca putarel piro arhitektonsko biroo vaš o projektiripe. O sertifikato vaš o šlosero/kolisarutno ka del leske o šajipe te ando biroo registruin vi akaja bući. „But sem lošalo kaj sićijav akala zanatura. Uč nakhlemas nekabor thana e bućake thaj sićilem mange but gadalestar so kerel o šlosersko faho. Napal so agorisarava o fakulteto, planiriv te miškosarav moro korkoro bizniso - dizajno thaj keripe e industriake mobiliarosko,“ vakarel i Nemanja.